الملاحظة ال 16 .... "بنى ادم ولا (جزمجى) " !

السلام عليكم و رحمة الله و بركاته ..

من أسبوع تقريباً ... , كنت قاعد على قهوة مستنى واحد صاحبى ...., فقعدت طلبت الشاى و بدأت أتأمل فى الشارع قدامى , الناس المارة , العربيات , المحلات ....

و أنا نازل بنظرى كده و جايب الصورة من فوق لتحت .. , خلاص عينى بتشوف دلوقتى "كاوتش العربيات" ...... , لقيت قدامى منظر , هو ما أوحى ليا بكتابة الملاحظة دى ..

 ! ! شفت "بنى ادم" ....... ,البنى ادم ده هو ما يطلق عليه فى مجتمعنا "جزمجى أو جزام" ... اللى بيلمع الجزم

و بصيت على الناس حواليه , اللى كانوا داخلين محلات الذهب بيشتروا ذهب و اللى كانوا بيشتروا أكل من المحل اللى على الناصية .. , و اللى كانوا فى القهوة "بيشيشوا " ..... !

و بعدين رجعت تانى بنظرى ليه , و بدأت أراقبه و هو مركز قوى فى جزمة عشان يلمعها , بس شايف فى عينيه حاجة ...

شايف إنه [[مكانش شايف الجزمة]] , إنما كان متنح , مش قادر يرفع راسه يبص على البشر دى ... , متنح و عنده بصيص من الأمل , إن حد يعدى عشان يلمعله الجزمة ... ويا سلام بقى كمان , لو اللى -إتلمعله الجزمة ده - , دفع كام جنيه من عنده !!!

حاولت فى خيالى - أعيش مكانه يوم - , تخيلت نفسى , بجيبلى فى اليوم كام ؟

عشرة جنيه صافى ؟

حاولت أتخيل لو بركب الأتوبيس ؟ ..لأ ثانية ! , هو أنا حركب الأتوبيس أبو جنيه و نص ولا أحسن أركب ميكروباص بخمسة و سبعين قرش و أنزل أتمشى الباقى ؟؟

لما أروح أجيب أكل لعيالى , هو أنا حدخل البقالة أشترى إرباع جبن مشكلة و لبن و بيض و عيش ؟

ولا لأ ثوانى , ده أنا أخرى حجيب جبنة صفيحة عشان توفر معايا , و العيش حجيبه أسمر من أبو شلن , بس لازم اصحى بدرى أقف فى الطابور و حجيب العيش ده , أخرى حاكل نص رغيف و كل عيل ياخدله نص .... أهم دول يمشونى لحد ما أجيب صافى اليوم اللى بعده

ححوش كل يوم جنيه عشان اعرف اشترى كام كيلو عدس يكفونى بقيت الشهر ((ما هو أكيد مش حفكر فى إنى حاكل كام صنف ! , أنا بس نفسى أنيم عيالى واكلين أى حاجة ))
--------------------------------------------

فجأة الراجل قام و شال حاجته ومشى , و طلعت أنا معاه من تخيلاتى دى ..........

جيه القهوجى , بيقولى , "تشرب إيه" ؟؟

فبتلقائية قولتله " شاى بحليب" ... , مترددتش فى الإجابة !

بس بعد ما طلبت , قلت أنا لو كنت عايز أطلب أى حاجة من القهوة , مكنتش ححط عامل "المبلغ" !! , أصل أخرى لما اجيب حاجة من القهوة ادفع كام يعنى 5 جنيه ؟

طب لو كان ال"بنى ادم" [المسمى جزمجى] , لو كان مكانى

كان حيجاوب بتلقائية زيى ؟

هو أصلاً كان حيطلب شاى - اللى هى أقل حاجة فى القهوة - من غير ما يتردد و يفكر هو حيعرف يروح و يأكل عياله ولا لأ ؟

و بعد شوية , رحت
Beano's Cafe

عشان عندى هناك معاد مهم مع ناس معرفمش , انا اه مش مقتنع بالأماكن دى , لكن لما قالولى نتقابل هناك مكنتش متردد برضه و مكنتش حاطط فى ذهنى عامل المبلغ

بس لما رحت هناك , شفت إزاى "تعريف الجنيه" , مختلف تماماً عن تعريف "الجنيه" عند ال"بنى ادم" .....

أكيد لو هو قاعد هناك شايف واحد بيشترى حاجة تتشرب , بعشرين جنيه , و فى الاخر يسيب نصها ....

أنا لو كنت مكانه , لو أنا ملاك , فرد فعلى حيكون على الأقل "دمعة" , لو رد فعلى طبيعى فحيكون حقد و كره ل"أصحاب الأموال" ...!!

---------------------------

المعاد كان مرتبط بموضوع "الصومال" .... !!! , اللى يودينا لوادى تانى بقى !

فإلى جانب كمية "الفقراء" أو بلاش , "الجوعى" , اللى فى بلدنا ......ففى مأساة إنسانية فى الصومال , المأساة دى مستمرة و شغالة ..

اه بنوديلهم تبرعات و ده يعنى أقل ما يمكن فعله , ولكن , الدنيا سخنت و الناس إتبرعت عشان صور و فيديوهات ....بعدين الموضوع هدى

و لكن ما زالت المأساة و ما زالوا محتاجين كتير .... و غير كده , هما يعدوا فى الاخر من أهلنا , يعنى فيه رابط إنسانى و مكانى و عرقى و دينى كمان !! , طب إيه عايز إيه تانى عشان "تهتم جداً بالموضوع " ؟؟

-------------------------------------------------------
هو المشكلة إن إحنا مش بنرتكب "حرام" ...أنا مش بتكلم فى ده

بس أنا بتكلم فى عبادة قد إيه ضرورية جداً و قد إيه تم ذكرها فى القران و فى الأحاديث ...........و قد إيه إحنا مهملنها !!

إزاى نعيش نصرف كتير فى حاجات - بنسبة كبيرة - هى ليست ضرورية بالمرة مقارنة بالإحتياجات الأساسية لهؤلاء !!

اه مش مطلوب منك تعيش بقحط ولا حاجة , بس شوف نبيك كان عايش إزاى ؟؟ شوف إنفاق الصحابة , و إزاى كانوا بينفقوا فى السراء أو حتى فى الضراء , حجم إنفاقهم مقارنة باللى معاهم !!

إسمع كده شوية الايات و الأحاديث اللى ممكن توريلك حجم الأهمية لعبادة إنت مهملها و بس اخرك تدى بقشيش زيادة تدى جنيه لسائل ولا حاجة ....

(وَأَنفِقُواْ فِي سَبِيلِ اللّهِ...)
 (فَاتَّقُوا اللَّهَ مَا اسْتَطَعْتُمْ وَاسْمَعُوا وَأَطِيعُوا وَأَنفِقُوا خَيْراً لِّأَنفُسِكُمْ)
بص إزاى ربط الموضوع بالتقوى ..؟؟ ده يخليك تشعر بقدر أهمية "الإنفاق" ..

{ فاتقوا النار، ولو بشق تمرة }.
يعنى تنفق ولو "بشق تمرة" .... و الإنفاق ده هو يخليك تقى النار !

{ ما نقصت صدقة من مال }
و ده حديث مهم جداً لو أيقنت بيه ... , لو مشيب بالمبدأ ده و بيقينك إنك مهما أنفقت فهو لا ينقص من المال و إن كانت عقليتك متستوعبش كيفية ده

ولكن حاجات متتحسبش بالأرقام ......لأن الأرقام دى بتاعت ربنا فى الاخر , هو القادر على مضاعفتها و هو القادر على إنقاصها مهما حرصت ....

فإحسبها بميزان ربك مش بعقلك ده .. , وهو نبيك قالك , ما نقصت صدقة من مال !!

---------------------------------------------------------------------------------
الشاهد فى الاخر ...

ربى نفسك على إنك تبقى عايش , بتقول لربك "لك الحمد و الشكر " , بتقوله "أنا عارف إنى لا أتميز عن اى "بنى ادم" نتيجة إنك رزقتنى ببضعة أموال حتروح فى الاخر " ....

بس تقول ده لربك بالعمل و الكلام ,

بالعمل يعنى بالإنفاق

يعنى كل يوم بدل ما تاكل ب20 جنيه كل بعشرة ,

بدل ما تركب ب 20 جينيه إركب بخمسة

و الباقى إتبرع بيه و أنفقه فى الخفاء ... و ساعتها إدعى ربك و ناجيه و أشكره قوى و

إعلم إن إنفاقاك هو نعمة عظيمة من الله و ليش بفضل منك

-------------------------------------------
فى الاخر حسيبكم مع حاجة سمعتها من
zap
و أثرت فيا فعلاً ...

محدش بيموت من الجوع .....لكن يموت موجوع....
موجوع من ألمه ....و ضاع حقه و حصرته
موجوع من ألمه ...بسكوت اخواته فى محنته
لكن ألآم الجوع ما تتوصف بلسان ..
أكذب و اقول عارف ....عمرى ما كنت جعان
عمرى ما خفت الموت ....يجينى من جوعى
عمر الهوان و الضعف.... ما بينوا ضلوعى
عمرى ما ذقت الجوع... ولا حس بيه لسانى
  جوعى ده كان فى صيامى .....ساعات و ينسانى
ولما عليا يشد ....يشد و اكون شكاى
طب لما انا اشكى........ هو يعيش إزاى ؟؟

---------------------------------------

و السلام عليكم و رحمة الله و بركاته ..

الملاحظة ال 13 : "من كى جى للاخرة " ... كن " حاذر للاخرة"

السلام عليكم و رحمة الله و بركاته

ارجع كده 15 سنة فاتوا ... , أيوة إفتكر كده لما كنت لسة فى كى جى كده ... فاكر كى جى دى كانت بتمثلك إيه ؟؟؟

فاكر شارع بيتكم ده , كان واسعو كبير قوى إزاى ؟؟فاكر إزاى كنت حاسس إن الدنيا دى كبيرة قوى و العالم كبر فجأة لما بقيت تروح المدرسة  و تمشى فى الشوارع كده ؟؟

-----------------------------------------------------------------------------------
طب فاكر بقى و إنت فى 5 إبتدائى كده و داخل على إعدادى ؟ كنت حاسس إنك كبرت إزاى , و بقيت شايف "عيال كى جى " أطفال إزاى ؟؟

طب فى ثانوية , فاكر إزاى كنت حاسس إنك بقيت جامد قوى و "عالمك" ده بقى كبيير و بقيت تعرف ناس فى كل السناتر و قافش بقى اصحاب قد كده , و بقيت شاب كفاءة  داخل جامعة ؟؟

و و إنت فى اخر الجامعة كده , فاكر كنت شايف إزاى ليك اصحاب بتنسى اساميهم من كترهم , و إزاى بقى عندك خبرات كتير اتعلمتها بسرعة قوى , وازاى عندك طموح و خطة عشان قدام تبقى حاجة..

--------------------------------------------------------------------------------------

-أقف بقى ثانية كده , إنت واخد بالك إزاى إن كل ما عمرك بيزيد , العالم بالنسبالك بيبقى مبهر و كبير قوى إزاى  و بعد تعدى المرحلة اللى إنت فيها , بتحتقره و أصلاً بتنساه و بتكسل تفتكره لأنه خلاص  
"عدى"
-------------------------------------------------------------------------------------

طب ركز كده هو على إفتراض إنك لسة عايش يعنى , كبرت و بقيت حاجة كده جامدة فى مجالك , حتبقى شايف فترة الكلية دى لعب عيال و لسة بيتعلموا و عالم صغير بقى ما خلاص إنت فى العالم الأكبر "بالنسبالك" و شايف إنك كده تمام

طبعاً موضوع ممل قوى ها , بس أنا وصلت للنهاية خلاص , اللى هى تعتبر البداية فى نفس الوقت ..

وصلت لمرحلة إنك مت , "ماشى يا عم مت بعد 100 سنة " , بس مت ...

تفتكر كده ساعة السؤال فى القبر , حتبقى شايف كل بقى الدنيا دى من أولها لأخرها عاملة إزاى ؟؟ !!!

لما و إنت كده إتقفل عليك فى القبر خلاص و الملكين بيسئلوك بقى , و إنت بتجاوب كده شايف أصلاً و لا بتفكر فى أى لحظة من  لحظات "الدنيا الفانية" دى

-----------------------------------------------------------------------------------------
طب يوم القيامة بقى , لما تقعدلك الااف السنين " على حسب ما احنا بنعد يعنى " , فى يوم القيامة ده و لسة مش عارف مصيرك أو ""خلودك"" حيبقى فين , حتبقى فاكر بذمتك أى لذة ولا أى حد ولا أى حاجة فى دنيتك فى الوقت ده ...؟؟؟

ولما كتابك تاخده و تستلمه كده و تبدأ تقراه , كما قال تعالى "إقرأ  كتابك كفى بنفسك اليوم عليك حسيبا" , ساعتها بقى إنت حتكون بتفتكر الدنيا دى ...

.-------------------------------------------------------------------------------------------
 بس ساعتها رغم إنك حتشوف لحظة لحظة فى الدنيا , حتبقى شايفها عاملة إزاى ؟؟ كل العالم ده و كل الحروب و كل الأعداء و كل الحلفاء , و كل أحلامك و كل إنجازاتك , و كل معارفك و كل أهلك و كل ناسك !!!حتبقى شايفها عاملة إزاى ؟؟ رد على نفسك كده !! "لهو و لعب "
 أو "فانية"  , او أياً كان المسمى

----------------------------------------------------------------------------------------

طب تخيل لما فى كتابك تيجى عند اللحظة اللى هى إنت كنت بتقرا فيها النوت دى .., و شفت نفسك عمال تقراها ...وبعدين شفت نفسك قفلت الكمبيوتر و قمت من غير متهتم بالكلام ده , تفتكر حتبقى عامل إزاى ساعتها ؟؟حتبقى ندمان , بس يوم لا ينفع الندم

---------------------------------------------------------------------------------------

أنا مش محتاج من النوت دى أرغى أكتر من كده لأن المفروض الرسالة وصلت ,

بس حفكرك بأية اخيرة كده لو محطيتهاش حلقة فى ودانك , حتندم و تبكى ساعتها لما تقول يا بس و لو خدت بيها و عملت بيها  , حتفرق معاك كتير قدام ربك

يقول تعالى "أمن هو قانت أناء الليل ساجداً و قائماً يحذر الاخرة و يرجو رحمة ربه , قل هل يستوي الذين يعلمون والذين لا يعلمون إنما "يتذكر أولو الألباب

خليك زى "يحذر الاخرة " ده  و عشان تبقى دايماً حاذر للاخرة , محتاج تبقى "ذاكر لله تعالى" دايماً بس انا مش حخش فى موضوع الذكر ده لأنى كتبت فيه قبل كده و اللينك تحت اهو

http://www.facebook.com/profile.php?id=601030529&sk=notes#!/note.php?note_id=10150141109268716

 متنساش , عيش دنيتك الفانية دى " حاذر للاخرة" ....والسلام عليكم و رحمة الله و بركاته

رمضان اللى إنت متعرفوش

السلام عليكم و رحمة الله و بركاته

من يومين كنت قاعد رايق كده , بفكر فى رمضان و إن يوم الأحد ليلة رمضان بقى و كده وحعمل زى كل سنة و أدخل سخن فى أول رمضان بفكر أختم كام مرة و ححفظ قد إيه و حصلى فين و مش عايز أفوت سنة بقى و كده ............

بعدها إفتكرت اخر يوم رمضان بقى , و أنا نازل أصلى التراويح بس مكسل أنزلها , و  إن انا بفوت سنن و إنى مش بكمل جزء قراية , هكذا ........'

بعدها بقى إفتكرت إن أنا الإسبوع اللى فات , (اللى هو قبل رمضان اللى بعد رمضان اللى فات بإسبوع) , صليت قيام مش فاكر يومين ولا تلاتة بس , وهما ركعتين حتى خفاف , وفيه أيام مكنش فيها ورد قران.....
----------------------------------------------------------------------------------------------------
هو الخلاصة إنى لاحظت إن القيام متعدمش لمدة سنة يعنى كان يقل و يزيد على فترات , بس لأنى " عودت " نفسى عليه لكن ده كان بعد رمضان ....

أكنى جيت بعد رمضان اللى فات ده و شحنت حلو و طلعت 100 متر لفوق و فضلت انزل بقى لحد رمضان ده بس فكرت بقى لو أنا داخل رمضان ده عشان منشن كده على القيام مثلاً , إنى أعود نفسى عليه بمعنى إنه يبقى ثابت فى حياتى بعد كده , فأعتقد إنى حطلع 1000 متر مش 100 .... ,

ففكرت بقى فى العبادات و الواجبات اللى واقعة منى و نشنت عليها و قررت إنها تبقى من "الثوابت" فى حياتى بعد كده , و قررت اخد فيها "تدريب " لمدة "شهر رمضان" و طبعاً شهر رمضان اكنه تدريب سنين من الشهور التانية, -------------------------------------------------------------------------------------------------------------------------------------------------
بدأت تستوعب إن رمضان ممكن يبقى ليه طعم و شكل مختلف ؟

إنك تكون جى يوم 11 رمضان , أو يوم 30 رمضان و مستموت فى العبادة و خاشع فيها و حريص على أداء السنن صح و حريص على زيادة الثقافة الدينية عندك و تحسين صلتك بربك ؟بمعنى اخر , إن رمضان واحد هو  "تربية " ليك مدى الحياة!!..

ممكن بقى تدخل رمضان كده السنة دى  ؟ إعرف من نفسك و من اللى حوليك إيه اللى واقع منك , وربى نفسك عليه فى رمضان  ده ------------------------------------------------------------------------------------------------------------------------------------------------
طبعاً مش حوصيكم على الإحسان فى عبادتك , يعنى الصيام صيام مش تقولى قبل الفطار ماسك نفسى و بعد الفطار انطلق بقى , لأ , إنت بتصوم عشان تربى نفسك على حاجة , متجيش تبوظها بعد الفطار , لا متصومش أحسن بقى !!

نفس الكلام فى قراءة القران , لو حتقرأ عشان تختم 20 مرة و إنت مش حاسس بحاجة و بتفر الكلام يبقى بلاش بقى ! , إقرا و تدبر , إقرا عشان كل مشاكلك و حلولها و مشاكل العالم ده و كله و حلوله فى الكتاب ده بس إنت تركز !!

القيام برده , مترحش تنام فى الجامع و ترغى مع صاحبك و تقولى مفوتش يوم قيام !! , لأ رايح بنية قيام الليل , يبقى تركز و تصلى الركعات و تستشعر الايات و لو مش مستشعر حاجة صليهم فى بيتك , بس المهم تستشعر

أذكار الصباح و المساء بوصى أى حد مش متعود عليهم , يعود نفسه فى رمضان و إقره فى فضلهم حتعرفوا أهميتهم

السنن و الضحى و الوتر و الأذكار بقى عند الإفطار و النوم والأكل و دخول و خروج المنزل و المسجد و الخلاء ...كل دى , لازم تفهم إنها غرضها حاجتين ,
إنك تبقى "ذاكر " لربك دايماً
و إنك تبقى ماشى على سنة نبيك لأنك عايز ربنا يلحقك بيه
---------------------------------------------------------------------------------------------------------------------------------------------
لو سمحت , إوعى حماستك و إنت داخل رمضان تروح , حافظ عليها أول بأول عن طريق " تجديد النية" :)والسلام عليكم و رحمة الله و بركاته

الملاحظة ال11: "مريض بالقلب" !!

السلام عليكم و رحمة الله و بركاته

بقالى فترة كده , مش مظبط كده , مش عارف مالى تعبان كده على طول و حاسس إنى مش طبيعى !! , بقالى فترة كده من أول الأجازة

الموضوع بدأ يزيد شوية و بدأت أقتنع إنى مريض , بس مش عارف بإيه لسة ...و الموضوع بدأ يأثر عليا شويتين

خلانى قليل الكلام على عكس عادتى , خلانى همدان عايز أقعد فى البيت و معنديش أى حماس للشغل (الشغل ده اقصد به التنمية فى المجتمع) اللى هو الحاجة اللى انا متعود أتسحل فيها  و بحب أتسحل فيها

المهم إنى عرفت بعد كده إن المشكلة فى :
"القلب" !!
------------------------------------------------------------------------------------------------------------------------

إيه بقى فى القلب ؟

فيه أنواع كتير لأمراض القلب , و خطورتها بتختلف من مرض لاخر زى إيه ؟ ,مرض نقص التروية,مرض القلب الناتج عن ارتفاع ضغط الدم, مرض القلب الالتهابي, مرض صمامات القلب,اعتلال عضلة القلب.....إلخ

بس انا إكتشفت إنى مريض بكذا مرض أخطر من دول كلهم !!

أنا مريض بالقسوة ,و الغفلة   ,الران, والموت

--------------------------------------------------------------------------------------------------------
أولاً , قبل ما أكمل و أشرح الأمراض دى , بعضكم حييجى فى باله " يا عم خضيتنى الله **** ده انا قلت إنت مريض بجد " 


لو حد جيه فى باله كده , فانا بقوله "يا ريت أكون مريض بجد بس مكونش مريض بالأمراض اللى قلتها دى !! , لأن فى الواقع المرض اللى إنت شايفه بجد ده فأولاً هو لا يعنى إن قلبك فى خطر أصل إنت فاكر القلب ده عضلة ..

بس القلب ده حاجة معنوية و ده الأهم , لو القلب العضلة مريض , فأهو تؤجر إن شاء الله و لما تموت خلاص إستريحت

إنما مرض القلب بمعناه المعنوى , فده الخطير بقى , أصله ممكن يوديك لل..... بصراحة مش قادر أقولها عشان تقيلة قوى لو لا قدر الله روحتلها مفيهاش رجوع !!
----------------------------------------------------------------------------------------------------------------------
ركز معايا بقى , يمكن يطلع عندك مرض من دول زيى يبقى ربنا يستر عليك !!

مرض القسوة ده إيه حكايته ؟ : 
(فويل للقاسية قلوبهم من ذكر الله)

( أَلَمْ يَأْنِ لِلَّذِينَ آمَنُوا أَن تَخْشَعَ قُلُوبُهُمْ لِذِكْرِ اللَّهِ وَمَا نَزَلَ مِنَ الْحَقِّ وَلَا يَكُونُوا كَالَّذِينَ أُوتُوا الْكِتَابَ مِن قَبْلُ فَطَالَ عَلَيْهِمُ الْأَمَدُ فَقَسَتْ قُلُوبُهُمْ وَكَثِيرٌ مِّنْهُمْ فَاسِقُونَ )

لو قرأت الايتين دول حتلاقى فيهم حاجة مشتركة و هى " "ذكر الله" فى الايتين ربنا ربط القسوة بذكر الله , و ده أول مرض إكتشفته , إنى بقالى فترة بصلى اه بقرأ قران اه , بصوم اه ماشى , بس فين ذكر الله !! ؟؟ مكنتش برده ذاكر بالمعنى الحرفى !!

مرض الغفلة :لا أذكر ايات تتحدث عن الغفلة الان , ولكن المعنى واضح , و هو متعلق بالذكر برده لما إن كلمة غافل عكس ذاكر
فالموضوع واضح

بالنسبة للران:
( كلا بل ران على قلوبهم ما كانوا يكسبون )

عن أبي هريرة عن النبي صلى الله عليه وسلم قال( إن العبد إذا أذنب ذنبا كانت نكتة سوداء في قلبه فإن تاب منها صقل قلبه وإن زاد زادت فذلك قول الله تعالى ( كلا بل ران على قلوبهم ما كانوا يكسبون )

اما الموت : 
( أو من كان ميتا فأحييناه)

و ده اياته كتيرة قوى , يا رب مكنش مصاب بيه فعلاً , أصل إحساس إن القلب مات ده تحسس الواحد إن خلاص مبقاش فيه أمل بس شوف ربنا بيقول "فأحييناه" دى اللى بتبعث الأمل فى نفس الوقت ..., و بحس إن ده أكتر ما يوصفنى إنى حسيت بموت القلب
--------------------------------------------------------------------------------------------------------------------------
عايز أقول بس حاجة , فيه أنواع تانية كتير ذكرت فى القران , لو إنت مصاب بنوع واحد بس فإنت فى خطر حقيقى , لو ربنا قبض روحك فى أى وقت و إنت مريض بالمرض ده ..!!بصراحة مش قادر أفكر فى العواقب بس اللى حقولهولك : إلحق نفسك و سارع لمغفرة من ربك و جهز نفسك قوى , ده حتى رمضان قرب !!

حط هدف قدام عنيك , الفترة الجاية تبقى منحنى من المنحنيات اللى بتقابلك فى حياتك و بتغيرك , تقربك لربك و تحيى قلبك

 اللهم أزل الران عن قلوبنا ...., ويا من أحيا الأرض بعد موتها .., أحيى موات قلوبنا ....امين

والسلام عليكم و رحمة الله و بركاته

"الشهادة بالإخلاص !"

السلام عليكم و رحمة الله و بركاته

أنا من زمان أول ما أسمع كلمة "الشهادة" بييجى فلاش كده فى ذهنى أو خيالات كده غزوة بدر مثلاً ولا سيف و دم كده !
و بصراحة كنت من صغرى لما بفكر تفكير بسيط جداً و أعرف إن الشهيد ده أعلى منزلة و أسمع قصص الصحابة , كنت فاكر إن أنا نفسى أموت شهيد....بس لما عرفت إن إنت لو كنت طالب للشهادة بصدق و مت حتى على سريرك , فأنت شهيد ......, بس خدت بالك من كلمة بصدق دى ؟

فبدأت كده أعود نفسى أدعى إن ربنا يرزقنى الشهادة ..., و بحاول أدعى بإخلاص و بصدق , و أحاول أتخيل كده فى ذهنى إن لو جتلى الفرصة حغتنمها على طول و فى ساعتها , و بعود نفسى على كده على التخيلات دى , عشان لو ربنا إختبرنى فى مرة , أبقى جاهز و أبقى شهيد.....مكنتش عارف هى الفرصة دى حتيجى إمتى و إزاى , بس كنت بحاول أستعد لها , لكنها جت فجأة
-------------------------------------------------------------------------------------------------------------------------------------------

"موقعة الجمل "

إيه بقى اللى حصل ؟؟؟ .......اللى حصل إنى كنت لسة فى البيت على الظهر كده و مكنش فى ضرب لسة , كان لسة بس كان فيه محاولات إقتحام البلطجية كمؤيدى مبارك و بدأ كده يبقى فيه طراطيش طوب و كده كان لسة النت راجع و لسة بتخانق على النت و بتاع و لازم ننزل و الكلام ده لقيت أبويا فتح الباب و قاللى "يلا يا إبنى مفيهاش قُعاد أكتر من كده , دى اللحظة اللى الرجوع فيها بفورة حتنزل ولا إيه ؟"طبعاً كنت لابس أصلاً , فنزلت أنا و هو و عمى ووصلنا عابدين كده و الموبايل رن..

ثانية واحدة هو إيه دخل الرغى ده فى الشهادة , إتقل جايلك فى الكلام ..الموبايل , رن , واحد صاحبى بيقوللى إلحق ده فيه جمال يا إبنى و حصنة و حرب إرجع يا إبنى إنت رايح فين !!طبعا أنا إتربيت ! , حصنة و جمال ! هو مفيش رجوع بجد يعنى ! ,

بس خدت القرار إنى حكمل و كملنا بس لاحظه  إنى إتربيت حبتين لما سمعت الكلام دهلما وصلت و دخلت بصعوبة , داخل كده قابلت واحد صاحبى , متعور بس إصابة سطحية و بسيطة , بس لقيته كده حضنى و بيدمع ! و لقيت أخوه سنانه متكسرة من الطوب !!المرة دى إتربيت أكتر حاسس إنى بقرب لحاجة كانت فى عالم تخيلى أنا كنت صنعه و بعيد عنه و مش متوقع إنى أروحله , رغم إن كان نفسى أروحله..,عالم الشهادة ده !

قالوا المتحف و كوبرى قصر النيل فيهم ضرب جامد , عمى وصاحبه راحوا الكوبرى و أنا و أبويا روحنا المتحف بقى و وصلت و شفت المنظر قدامى , وصلت لحد النقطة اللى من بعدها الطوب بيطير عليك و حتبدأ المخاطرة ! و سمى النقطة دى النقطة الفارقة

----------------------------------------------------------------------------------------------------------------------------------------------
هنا بقى عرفت يعنى إيه إخلاص ! أنا عمال افكر فى الشهادة و بدعى بيها و أنا فاكر إنى بدعى بصدق ..., وكونت العالم التخيلى ده اللى حيبقى فيه فرصة إنى أكون شهيد , حرب و بتاع ..........................بس وقفت عند النقطة الفارقة دى و متحركتش!!

إيه ده أنا حدخل كده ده الطوب مطر ! إيه ده واحد خد طوبة قدامى أهو و شكله إيه عايش ده ولا إيه !! ............إيه ده حادخل هنا !!
هنا بقى إتربيت بقى بشكل مكنش فى العالم التخيلى بتاعى , مكنتش عامل حساب الشعور ده , مكنتش عارف إنى بعيد قوى عن الإخلاص !!

بس لقيت أبويا بقى مكنش شايف تقريباً النقطة الفارقة دى كان ماشى عادى جداً و داخل , وهو أصلاً مبيعرفش يحدف طوب بس داخل و بيقوللى أٌقف ورايا و إرمى من ورايا !!!
أخدت بالى من الفرق الكبير بقى لما شفت ناس زيه كده بس شباب , بقى إسمهم بعد كده "شهداء" , شفتهم بس مش كويس أوى أصلهم كانوا بعاد عنى جداً !!!!!!!و قررت ادخل , بس كنت متاخر بقى , مش متأخر على الضرب ده كان لسة ضرب الطوب مش بقاله كتير , لكن على الشهادة ! , المخلصين سبقوا و مصدقوا عشان هما مخلصين ! إنما انا إكتشفت إنى مكنتش مستعد !قررت بقى ! إنى أعدى النقطة دى ,

قررت إنى خلاص مستعد أسيب الدنيا , مبقاش ليها مكان تماماً عندى , بس والله أول ما أخدت القرار ده و إتحركت و عبرت النقطة , نسيت إن فيه طوب و كنت حاسس إنه نسيم مش طوب ! الطوبة كانت تيجى فيك تحس إنك أقرب , أقرب للشهادة ! , و لقيت نفسى بزعق فى الناس زعيق , يا جدعان يلا إنتوا مش رجالة ولا إيه , يلا بينا يا رجالة نساعد "المخلصين " اللى واقفين بقى فى خط كده لوحدهم قدام !

أكيد مزعقتش و قلت المخلصين يعنى  بس كنت بقول "الرجالة " اللى قدام و لقيتنى بجرى و أبويا مش ملاحقنى لقدام , ومسكت الطوبة و بدأت أحدف , وأنا أصلاً إيدى ضعيفة بس كنت بوصل لأبعاد مش عارف الصراحة عملتها إزاى ساعتها !!!

و قابلت بقى المخلصين دول اللى فى أول خط, خط الشهداء ده اللى مش بنشوفه, كانوا لا يوصفون , تلاقى واحد مثلاً واقف لوحده مفيش أى حماية .., وعادى بيلم الطوب و يحدف و أهم حاجة مكنش بيرجع خطوة لورة , الناس ساعتها كانت بترجع على فكرة لأن المعظم زى حالاتى كان لسة معداش النقطة ! إنما دول كانوا بيثبتوا حتى لو إيه !و عرفت الفرق ساعتها ,

بس والله كل لحظة من لحظات الضرب دى , كنت فيها حاسس إنى برتقى بمعدل خرافى ! و محدش حيصدقنى لو قلتله أنا ندمان إزاى إنى مكملتش فى الصف اللى قدام للفجر ! خستعت على بليل كده ! والله ندمان , فوت على نفسى فرصة إنى أبقى ........................."شهيد"

بس بعد ما ندمت , فكرت , إن المرة الجاية لو فيه مرة جاية , مش حعدى الفرصة .................وبعدين حسيت إن لأ الفرصة موجودة على طول ! , موجودة طول الوقت بس إحنا مش فاهمين !هو مش الصحابة دول , الشهداء دول , كانوا عايشين عيشة الشهداء ؟ يعنى كانوا محضرين نفسهم للشهادة ولا لأ ؟؟؟؟ , مش بس محضرين , هما عايشين على الأساس ده أصلاً , تصرفاتهم بتدل عليهم , بيبانوا كده

تسمع عن شهداء حماس مثلاً , من زمان , حافظ القران كله , متفوق,ذو خلق رفيع و هكذا طب ما أنا أعيش عيشة الشهداء دى , أعتقد إن هو ده معنى كلمة "إسأل الله الشهادة بإخلاص"إنى أعيش العيشة دى و أقدمها لربى عشان يحسبنى شهيدطولت أوى بس إعتبروها قصة بسيطة حقيقية ---------------------------------------------------------------------------------------------------------------------------------

 "عيش عيشة الشهداء"

"السخرية من الغير"

السلام عليكم و رحمة الله و بركاته

السخرية ,الغيبة و النميمة  , و البهتان و الافك..............مشكلة, فعلا مشكلة كبيرة قوى و على ما اعتقد "كلنا" بنقع فيها "على طول "  , الغيبة و النميمة دول اكنهم فران عمالين يكلوا من حسناتنا و عاملين يكبروا و هما اصلا سيئات.

والغيبة هى أن تذكر أخاك بما يكره

اما النميمة فهى :أن تؤمن على سر فتنقله إلى الغير


قال الحسن البصري رحمه الله: "الغيبة ثلاثة أوجه كلها في كتاب الله: الغيبة، والإفك، والبهتان، فأما الغيبة: فهي أن تقول في أخيك ما هو فيه، وأما الإفك: فأن تقول ما بلغك عنه، وأما البهتان: فأن تقول فيه ما ليس فيه".


واحد يقوللى طب انا بقول حاجة موجودة فعلا فى الشخص الفلانى مش بافترى عليه يعنى .., اقولوا طب خد الحديث ده
"ذكرك أخاك بما يكره، فإن كان فيه ما تقول فقد اغتبته، وإن لم يكن فيه ما تقول فقد بهته"
وقال تعالى : ﴿وَالَّذِينَ يُؤْذُونَ الْمُؤْمِنِينَ وَالْمُؤْمِنَاتِ بِغَيْرِ مَا اكْتَسَبُوا فَقَدِ احْتَمَلُوا بُهْتَانًا وَإِثْمًا مُبِينًا )

فاصلا لو بتقول حاجة على واحد و هى مش فيه دى مصيبة , يعنى انت مثلا بتشتم فى تاجر و تقول انه نصاب ده باعلى العصير  نص جنيه زيادة , و بعدين تلاقى انو غلى فعلا فى كل مكان , انت كده عملت مصيبة !!

والغيبة حرام بنص القرآن والسنة وإجماع العلماء، وعدَّها العلماء من الكبائر، لقوله تعالى: ﴿وَلا يَغْتَبْ بَعْضُكُمْ بَعْضًا﴾، قال ابن عباس: "حرَّم الله أن يغتاب المؤمن بشيء كما حرم الميتة".

المغتاب ده بيشوف عيوب الناس و مش شايف نفسه , ، قال أبو هريرة: "يبصر أحدكم القذى في عين أخيه، ولا يرى الجذع في عينه". , يعنى انت بتتريق على واحد مثلا عامل شعره بشكل معين او لابس حاجة معينة و انت متعرفش هو حالته ايه ..., و مش مدرك انك عندك مشاكل كتيير اكبر ....

-----------------------------------------------------------------------------------------------------------------------------------------------
انا فكرت شوية و قلت اراجع نفسى فى يوم , لقيت ان انا جبت سيرت ناس , و اتريقت على ناس للصبح , فالح بس انصح ده و ده و ناسى نفسى !!!!!!! , فعلا دى مشكلة كبيرة قوى اننا نغتاب الناس و ان كان فيهم العيب ده , و لو مش فيهم تبقى كارثة............طب ليه احط نفسى فى الموقف ده ما انا من الاول مجيبش سيرت حد بحاجة ميحبهاش.

فى سورة الحجرات ايتين كلنا حفظناهم من صغرنا بس مين بيعمل بيهم ؟

( ياأيها الذين آمنوا لا يسخر قوم من قوم عسى أن يكونوا خيرا منهم ولا نساء من نساء عسى أن يكن خيرا منهن ولا تلمزوا أنفسكم ولا تنابزوا بالألقاب بئس الاسم الفسوق بعد الإيمان ومن لم يتب فأولئك هم الظالمون  )

تخيل ربنا بيقولك امر كده "لا" يسخر قوم من قوم ،  و اسمع بالمرة الحديث ده ,قال رسول الله - صلى الله عليه وسلم :" الكبر بطر الحق وغمص الناس " ويروى : " وغمط الناس " والمراد من ذلك : احتقارهم واستصغارهم ، وهذا حرام ، انت بتسخر من حد عشان شايف فيه حاجة صغيرة , لبسه , طريقة كلامه , شكله , عيب بسيط فيه ...., بس متعرفش انو ممكن عند ربنا يبقى احسن منك بكتيير قوى ؟ و ده المهم اصلا فى الاخر , المهم عندج ربنا مين احسن.


وقال  ( ولا تلمزوا أنفسكم ) أي : لا تلمزوا الناس . وقال ايضا ( ويل لكل همزة لمزة ) , والهماز اللماز يعنى المذموم و الملعون  ، "فالهمز بالفعل واللمز بالقول "، كما قال : ( هماز مشاء بنميم ) أي : "يحتقر الناس ويهمزهم طاعنا عليهم ، ويمشي بينهم بالنميمة وهي : اللمز بالمقال" ; ولهذا قال هاهنا : ( ولا تلمزوا أنفسكم )

وقال : ( ولا تنابزوا بالألقاب ) و دى بقى من اكبر المشاكل اللى عندنا , كلما نشوف حد من اصحابنا ولا فى الشارع بنناديه باسم معين يضحك , بس هل هو راضى عن الاسم ده يعنى مبسوط بيه ؟ .., ياخى حب لاخيك ما تحب لنفسك , و اسمع كلام ربنا اللى جه واضح و صريح , ولا تنابزوا , امر واضح اهو.


وقوله : ( بئس الاسم الفسوق بعد الإيمان ) أي : بئس الصفة والاسم الفسوق وهو : التنابز بالألقاب ، كما كان أهل الجاهلية يتناعتون .


------------------------------------------------------------------------------------------------------------------------------------------
نيجى لحتة بقى معتقدش ان حد مش بيتعرضلها ، لو واحد دلوقتى اغتاب حد قدامك , لو انت منفضله و بتاخده على قد عقله , اعتقد تبقى مدافعتش عن اخوك و شوف انت دى عند ربنا قد ايه , بص الحديث ده  : "من رد عن عرض أخيه، رد الله عن وجهه النار يوم القيامة".
  
  
و حاسب قوى من الحديث ده : "يا معشر من آمن بلسانه، ولم يدخل الإيمان قلبه، لا تغتابوا المسلمين، ولا تتبعوا عوراتهم، فإنه من اتبع عوراتهم يتبع الله عورته، ومن يتبع الله عورته يفضحه في بيته". بص وصلت لايه ؟ , امن بلسانه و لم يؤمن بقلبه !! ده يدل على ايه ؟


لقد سُئل النبي من أفضل المسلمين، فكانت إجابته بهذا الحديث الشامل الجامع قال: "من سلم المسلمون من لسانه ويده"
 وجاءت وصيته العامة بهذا الحديث من أجل سلامة الصدور بينه وبين أصحابه، وبين المسلمين عمومًا، فقال: "لا يبلغني أحد من أصحابي عن أحد شيئًا، فإني أحب أن أخرج إليكم وأنا سليم الصدر".


---------------------------------------------------------------------------------------------------------------------------------------------
اخيرا , كل الايات و الاحاديث اللى كترت شوية فى النوت دى , ان دلت على شئ فهو انه الموضوع مهم و ان دى افة كتير مننا بيغفل انها ممكن تسببلوا هلاك فعلاً

يا ريت يا جماعة تعاهدوا ربنا انكم مش حتسخروا ولا تغتابوا اى حد و لو حصل قدامكم تمنعوه , و اتفقوا مع اصحابكم على كده , مظنش ان حد يحب يقابل ربنا و هو قارئ للنوت دى و معملش بيها------------------------------------------------------------------------------------------------------------------------------------------------
وافتكر دائما الاية الكريمة : "وَمَنْ أَظْلَم مِمَّنْ ذُكِّرَ بِآيَاتِ رَبّه فَأَعْرَضَ عَنْهَا وَوَنَسِيَ مَا قَدَّمَتْ يَدَاهُ"

والسلام عليكم و رحمة الله و بركاته

الذكر

كتبت بتاريخ 1 ابريل :

Edit

Note of The Week : Note No.7 : "الذكر"

by Mahmoud El-Amir on Friday, 01 April 2011 at 02:02

السلام عليكم و رحمة الله و بركاته

اولا قبل ما تقرا النوت دى اللى هى عن الذكر اللى غالبا سمعت مليون مرة عنه بس ممكن تكون محستوش ولا مرة......,
قبل ما تقرا النوت حط هدف ليك كده انك لو اتأثرت بالنوت دى حتعمل فعلاً على الذكر دائما , حتعمل على ذكر ربنا طول حياتك
-------------------------------------------------------------------------------------------------------------------------------------------------
ايه الفكرة فى انك مثلا تسبح 100 مرة , او تستغفر 100 مرة , ولا تمشى ماسك سبحة يعنى حبكت يعنى تعمل كده فى المكان الفلانى ؟؟!!

طب اتسألت كتيير انت بطلت تسمع اغانى , هى حرام ؟؟
طب تعالى نروح الحفلة الفلانية وبتاع , حرام ولا انت مبتجيش ليه ؟؟؟

الفكرة ان المسائل اللى زى دى اللى مبتبقاش يمكن واضحة قوى حرمانيتها او لا بتبقى اسمها شبهات ,
لكن الفكرة ان الموضوع بشوفوا بنظرة تانية !!

بشوف ان الكلام ده بيبعدنى غصب عنى عن ذكر ربنا , بغض النظر عن الاغنية فيها ايه وبتاع , بشوف ان انا اصلا حستريح كتيييير اوى لو بعدت شوية عن الحاجات دى , و ذكرت ربنا

-----------------------------------------------------------------------------------------------------------------------------------------------

طب و ايه الفكرة الكبيرة فى الذكر , يعنى منا ممكن اذكر ربنا و اسمع مثلا اغانى عادى مفيهاش مشاكل !!!

اه طبعا ممكن تعمل كده و انا مش بقول ان ده حتى فيه مشكلة , بس انت مش واخد بالك من اهمية الذكر للاسف

الذكر يا جماعة هو من الاخر الزتونة كده , فعلا هو اللى لو انت تمكنت من ممارسته ,
يبقى حتنجى ان شاء الله + انك حتستريح طول حياتك الدنيوية

ازاى بقى ؟؟ بص كده الاية دى  "

يعنى الكتاب ده بص ربنا جمعلك اللى فيه فى كلمة واحدة ..., "فيه ذكركم" , يعنى الكتاب اللى احنا عارفين انو هو سبيل نجاتنا لو مشينا عليه , ربنا وصف اللى فيه "بذكركم" و حتى بيقولك " افلا تعقلون " ...يااااه

ابتديت تاخد بالك ممن اهميته ؟

انت الحمد لله مؤمن و بتصلى و بتطيع ربنا , بتنسى و بتتوب الحمد لله
بس مشكلتك فى ايه ؟؟؟ ....انك بتنسى !! ,
بتنسى ربنا احيانا فبتغلط بقى و بتكون مهموم لاسباب كتيرة, احيانا ببتشائم , بتصيبك الابتلاءات بس انت مبتستحملش !!

طب و حل الكلام ده ايه ؟

ايوة الذكر هو حل الكلام ده , لان ببساطة المشكلة اصلا عندك فى النسيان اللى لو عالجته حتستريح , و حتعالجه بالذكر,

الذكر بقراءة القران , الذكر باذكار الصباح و المساء و النوم و ادعية الطعام و الشراب و دخول المساجد و الحمام و اللبس الجديد و دخول السوق و ركوب السيارة و المرض و السفر و المذاكرة و كل حاجة فى حياتك !!خدت بالك بقى ان ربنا مهيألنا طريق الذكر ده ؟ , حاطت ذكر لكل حركة فى حياتك و مجهزه ليك و مستنيك انت تذكره ّ!!!!

نقطة ان الذكر فيه راحتك بقى , اية معروفة كلنا عارفينها : "الَّذِينَ آمَنُوا وَتَطْمَئِنُّ قُلُوبُهُمْ بِذِكْرِ اللًّهِ الا بِذِكْرِ اللَّهِ تَطْمَئِنُّ الْقُلُوبُ" و دى بقى

مش حقدر اوصفها ابداً لان فعلا شعور الاطمئنان ده مش حتحسه غير لو اتعودت على الذكر , حيخليك تصبر على اى حاجة , حيخليك مش قادر تعصى ربنا , حيخليك مطمئن فى حياتك فعلا

و الاحلى انك لما تموت ( متقوليش بعد الشر يعنى مش شرط يبقى شر ) تموت و انت ذاكر لربنا ..............ياااااااه احلى موتة بجد !!

------------------------------------------------------------------------------------------------------------------------------------------------

تتطلع من الكلام ده بأيه ؟

على الموبايل او حاجة المهم تفتكر انك حتذكر ربنا قبل ما تنام قبل ما تاكل و انت فى الاتوبيس حتاخد معاك مصحف تقرا فيه , و انت فى العربية تسمع قران , تاخد عهد على نفسك بالتزام ذكر كعين مثلا استغفار 100 مرة الصبح و 100 بليل , شوف انت حتقدر الموضوع  reminder 1- ممكن بقى تبدأ من النهاردة كده تعمل

2-تستشعر ان اى عمل بتعمله بتحضر محاضرة حتى قاعد فى شغل اياً كان , تستشعر انك ذاكر لربنا و ان العمل ده لربنا , فى نفس الوقت لو حاجة قلبك مش مستريحلها فكر ربنا راضى عنك كده ولا لأ ؟

تدعى ربنا بيقين و اخلاص انو يرزقك نعمة ذكره و حسن عبادته , تدعى بيها فى كل صلاة  3
اللهم اعنا على ذكرك و شكرك و حسن عبادتك
 -----------------------------------------------------------------------------------------------------------------------------------------------

و خلى بالك دلوقتى فيه رقيب و عتيد على يمينك و شمالك ..., زائد ان ربنا اقرب ليك من حبل الوريد , فهو شاهد انك قريت النوت دى , يا ريت تعاهد ربنا على انك تعمل على ذكره اناء الليل و اطراف النهار.

والسلام عليكم و رحمة الله و بركاته

"عودة"

كتبت بتاريخ 26 فبراير 2011....

السلام عليكم و رحمة الله و بركاته

اللهم ردنا الى دينك ردا جميلا.. 0...

سمعت الدعاء ده " اللهم ردنا الى دينك ردا جميلا"..... و ردت فى نفسى كدة خاطرة بعثت فى نفسى نوع من الندم الممتزج بالتفاؤل , اللى هو لما تتصدم و تعرف الحقيقة فتتبسط انك فهمت و فى نفي الوقت تندم على اللى فات.........0

حسيت بأهمية الدعاء ده قوى , و الدعاء ده فهمنى حاجة سبحان الله يمكن واضحة قوى قوى , بس أقلية قليلة هى اللى"فاهماها" و فاهماها بمعنى الكلمة , .......فهمنى اد ايه احنا هالكين لو مرجعناش لدينا و لربنا , فهمنى انو  مهما حاولنا و مهما فكرنا و مهما اختلفنا , كل ده ملوش اى لزمة لو احنا مش مرتبطين برنا و بدينا ارتباط وثيق...................0

أكبر حدث وضحلى المفهوم و الحقيقة دى هو الثورة اللى فاتت دى......بص الاية دى كدة ( يا أيها الذين آمنوا إن تنصروا الله ينصركم ويثبت أقدامكم) , اية  كلنا عرفنها و كمان فهمنها و ده الغريب بقى , انا كنت فاكر نفسى فاهمها و حاسسها , لكن واضح لأ لأنى لو حاسسها فعلا كنت اتحركت من زمان , مكنتش استنيت الثورة عشان اتحرك , كان زمانى نصرت ربنا بجد طول حياتى  , نصرتوا فى عباداتى , فى دعوتى , فى تعاملاتى , فى دراستى , فى رياضتى , فى كل عمل باعمله عامة فى دنيتى......0

الفكرة ان ببساطة الاية دى كانت قدامنا من الاول , لكن احنا كنا راضيين بالذل ده و مكناش قادرين ننصر ربنا , ما هو اصل لما يكون معظم الشعب اصلا بيخاف يتكلم علنى على اى حاجة ليها علاقة بفساد البلد, لما 25% من الشعب بس هو اللى يروح ينتخب , دا حتى الناس كانت بتخاف تكتب حاجة كدة ولا كدة عالميل او الفيس !! , طب ماحنا فعلا كنا خايفين ننصر ربنا , و عشان كدة كان ربنا مبتلينا طول السنين اللى فاتت , و بعدين ببساطة الشعب بدأ يفوق , فربنا كما وعدنا فى الاية الكريمة , نصرنا و فى وقت قياسى اللى ان دل على شئ فهو على ان النصر ده من عند ربنا و بس .......اصل ميين كان يصدق ان هما 18 يوم ؟؟؟

اللى عايز اقولوا من كل الرغى اللى فوق ده , ان الحل لكل مشاكلنا , عشان بقى سواء البلد تتقدم , أو على المستوى الشخصى , هو واضح جدا , هو الرجوع للدين و الارتباط الوثيق بربنا عز و جل

ليه بقول كدة ؟
لأن فى تاريخنا , معروف ان أفضل فترات عاشتها أمتنا هى كانت فترات التزام الناس بالدين و ده واضح سواء كان ايام نور الدين و صلاح الدين الايوبى ,  او فى عهد الرسول صلى الله عليه و سلم و فى عهد الخلفاء الراشدين
 و بعدين ما هو بالمنطق يعنى احنا المفروض بنتبع السنة , و واضح لينا  ازاى حياة الرسول كانت مثالية رغم انها كانت اصعب حياة ممكن يواجهها انسان , ده كله لانه كان ناصر ربنا طول حياته و فى كل حاجة بيعملها, طبعا كلنا عارفين الكلام ده بس ليه بقى كتير قوى مننا مقتنع فى قرارة نفسه ان معلش حياة الرسول دى نحطها فى كتاب و نعلقه , و حياتنا بقى دى حاجة تانية خالص .....
لكن حديث الرسول (ص) : " تركت فيكم ما إن تمسكتم به لن تضلوا بعدي كتاب الله وسنتي" مبين قوى الموضوع ببساطة , عشان منضلش , الحل بقى مقالش حرية ولا ديموقراطية ولا برلمانية ......قالك القران......, و السنة .......0

الفكرة ان كلنا فاهمين كدة , بس برده من جوانا مفيش , كام واحد فينا بيقرا تفسير ...لأ كام واحد بيقرا قران اصلااا....كام واحد طيب دارس السيرة و بيحاول بقى يمشى فى حياته على نهج الرسول عليه الصلاة و السلام ؟؟!! ...انا عارف ان كل واحد حر , بس نفسى اعرف ليه ! , ليه منلتزمش بديننا و نسمع بقى كلام ربنا صح ,

بالمناسبة انا مش بقول ان بقى لو كلوا رجع لدينه الدنيا حتمشى وردى , لأن بالعكس معروف ان حياة الرسول كانت اصعب حياة , لأن ربنا دايما بيختبر و يبتلى المؤمن , فكل ما ازداد ايمانك , ازداد ابتلاءك

بصوا كده الايات دى بقى بعد الكلام ده..
أَلَمْ يَأْنِ لِلَّذِينَ آمَنُوا أَن تَخْشَعَ قُلُوبُهُمْ لِذِكْرِ اللهِ وَمَا نَزَلَ مِنَ ا لْحَقِّ وَلاَ يَكُونُوا كَالَّذِينَ أُوتُوا الْكِتَابَ مِن قَبْلُ فَطَالَ عَلَيْهِمُ الاْمَدُ فَقَسَتْ قُلُوبُهُمْ وَكَثِيرٌ مِنْهُمْ فَاسِقُونَ (16) اعْلَمُوا أَنَّ اللهَ يُحْيِي الاْرْضَ بَعْدَ مَوْتِهَا قَدْ بَيَّنَّا لَكُمُ الاْيَاتِ لَعَلَّكُمْ تَعْقِلُونَ (17)0

يا جمعاة مش عايزين نغلط غلطة اهل الكتاب ........ان طال عليهم الامد فقست قلوبهم.. ده لو حصل نبقى هلكنا , ما هو ربنا رحيم طبعا و بيدينا فرص على طول , لكن فى وقت من الاوقات ربنا حيحاسبك على كل حاجة.....لكن فى الايات بعد الكلام ده ربنا بيقول اعرفوا انو بيحيى الرض بعد موتها , فاللى فعلا وصل لمرحلة فسوة القلب دى ربنا برحمته حيحيى قلبه تانى , بس هو لازم ياخد الخطوة الاول

ممكن بقى يا جماعة ناخد الخطوة , و ندعى ربنا يعينا ؟

ناخد الخطوة باننا اولا لازم نكون بنقرأ كتاب الله مرة فى اليوم , لازم نبدأ نقرا فى التفسير , و نقرا فى اعجاز القران عشان حتى نفسنا تطمئن........برده لازم نسمع السيرة و نحللها عشان نعرف نطبقها على حياتنا الشخصية , و انا بانصح بمحاضرات الدكتور راغب السرجانى عشان تحليله ما شاء الله كويس قوى.......

بغض النظر دى شوية حاجات اعتقد انها اساسية , كل واحد ليه اسلوبه و طريقته , دى علاقتك انت مع ربنا المهم انك توثق العلاقة دى

فادعوا معايا بقى من قلبكوا  بعد ما تكونوا بدأتوا العمل....0


اللهم ردنا الى دينك ردا جميلا

"احنا مش عايشين"

1.احنا عايشين ليه؟.

• ان نكون خلفاء الله فى الارض

طب طالما ان احنا عارفين السبب اللى عايشين عشانو , ليه احنا مش عايشين للسبب ده ؟ .2

• لأن معندناش حافز قوى يخيلينا فعلا عايشين للسبب ده
• لأن احنا مش مدركين ان احنا بنتحاسب على الموضوع ده

3. طب بص بقى فاكس الحوارات دى يا عم , مش فاضى لجو التفكر ده ....ماشى انت حر بس سيبنى اعرفك بس انت وضعك ايه دلوقتى , بعديها حدد انت ناوى تكمل حياتك ازاى ,طيب نعمل ايه بقى و ازاى فعلا نعيش كل لحظة فى حياتنا للسبب ده الى هو يأدى لرضا ربنا ان شاء

دلوقتى حناقش كل نقطة من دول
..............................................................................................................................................

أولا : احنا عايشين ليه ؟.... ربنا قال فى القران :(ثُمَّ جَعَلْنَاكُمْ خَلاَئِفَ فِي الأَرْضِ مِن بَعْدِهِم لِنَنظُرَ كَيْفَ تَعْمَلُونَ {14}‏) ,(وَهُوَ الَّذِي جَعَلَكُمْ خَلاَئِفَ الأَرْضِ وَرَفَعَ بَعْضَكُمْ فَوْقَ بَعْضٍ دَرَجَاتٍ لِّيَبْلُوَكُمْ فِي مَا آتَاكُمْ إِنَّ رَبَّكَ سَرِيعُ الْعِقَابِ وَإِنَّهُ لَغَفُورٌ رَّحِيمٌ {165}‏) طب يعنى ايه الكلام ده ؟ , يعنى ربنا خلقنا عشان نعبده و من ضمن عبادته ان احنا نكون خليفته بمعنى ان احنا نحاول بقدر المستطاع نصلح فى الأرض و نوجه الناس لعبادة ربنا باننا ندعوهم للاسلام , و اللى منهم مسلم نوجهو للالتزام بدينه و نعرفو دوره  , ودى الطريقة المثالية اللى لو كلنا اتبعتاها صح , العالم ده حيبقى عالم تانى , و الامة حترجع لمجدها وبالعقل كده ,ربنا خلق كل حاجة , و حطها فى مكانها الصح,ربنا خلق السمك فى البحر , الطير فى السما , انت بقى هو ده مكانك اللى ربنا خلقك عشان تكون فيه , بس اداك حرية الاختيار ,, على عكس بقيت المخلوقات , فانت لو فعلا اتحطيت فى مكانك المظبوط اللى ربنا خلقك ليه , حتعيش سعيد قوى بجد فى الدنيا و الاخرة ان شاء الله

, ثانيا: احنا ليه مش عايشين للسبب ده ؟ ....لان كتير قوى مننا مسلمين بس مش فاهمين بالظبط يعنى ايه مسلم , و يعنى ايه مؤمن ,"قَالَتِ الأَعْرَابُ آمَنَّا قُل لَّمْ تُؤْمِنُوا وَلَكِن قُولُوا أَسْلَمْنَا وَلَمَّا يَدْخُلِ الإِيمَانُ فِي قُلُوبِكُمْ ", مسلم يعنى استسلم لربنا و انقاد لطاعته , انما مؤمن ده بقى عنده ايمان بالله او يقين بالله عن علم و عن قلب, طب أكيد يعنى المؤمن احسن من المسلم ,طب انت بقى شايف نفسك فين ؟ , اكيد كلنا نفسنا نبقى مؤمنين , متقين , محسنين كمان ,  بس ليه مبنحاولش نبقى كده ؟ ,اكيد لان الدنيا شغلانا قوى, و لاننا بنحسبها غلط , تقول فى نفسك "يا عم ربنا رحيم و ان شاء الله ادخل الجنة , منا بصلى و بصوم يبقى خلاص ,المهم بس اذاكر و اظبط نفسى عشان اشتغل شغلانة حلوة و اعيش حياة حلوة "....... دى مشكلة , مشكلة تانية بقى , اننا مش عارفين ان احنا بنتحاسب ان احنا مش بنعبد ربنا صح باننا نكون خليفته , يعنى بما ان ربنا خلقنا عشان ده دورنا , و الرسول (ص) كان عايش للسبب ده , والصحابة و كل رموز العالم الاسلامى كانوا نفس النظام,يبقى ده الطريق الصح,...... و احنا بقى ""منفضين"" رغم كل ده , اصل ""كفاية علينا الصلاة والصوم !!"" - طبعا مش بقلل من قدر الصلاة , دى عماد الدين - لكن قصدى الدين مش بس انك تصلى , و هو ده هدفه الوحيد!!

ثالثا : لو عايز بقى تفكس للكلام ده كله لانك مش حاسس بمشكلة اصلا , خلينى بس احاول اساعدك تقيم وضعك الحالى.... , اكيد انت بتفكر فى انك طالما بتصلى و بتصوم و بتأدى اركان الاسلام , فانت فى الجنة اكيد , ففاكس بقى كل الرغى اللى بقولو ده ..., جميل انا حاثبتلك انك حتى الحاجة اللى مخلياك فاكر نفسك داخل الجنة , انت مبتعملهاش اصلا....

• بتقول الشهادة و انت عندك يقين فعلا ؟؟, يعنى معندكش ذرة شك و انت بتقولها , لو عنك الذرة دى فده طبيعى ,لانك اصلا معندكش العلم الكافى اللى يخليك متيقن......ياااه يعنى الشهادة بالله اللى هى اصلا اول اركان الاسلام , ممكن اكون مش فاهمها صح ؟ , اه ممكن لان انت محاولتش تعرف اصلا .... 
• طيب و الحل ايه بقى ؟  ساعتها بقى واجب عليك انك تعرف العلم ده , ده مش معناه انك تبقى عالم , بس تبقى فاهم للدرجة اللى تخليك تعبد ربنا صح , العلم ده على فكرة سهل تعرفوا بس هو واجب تعرفوا , مثلا لو قريت عن العلم و الايمان  فده حيبقى كويس اعتقد , انت بس تحط الموضوع فى دماغك و ان شاء الله ربنا حيوفقك 

• , حاسألك سؤال ,انت بتصلى بجد ؟ , يعنى كل صلاة فى اليوم و كل ركعة و كل سورة ,بتقراها و انت مستشعرها و حاسس قوى بيها ؟ , طب لما بتصوم , طول اليوم مستشعر معنى الصيام و فعلا بتصوم بجوارحك بلسانك , بعينك ؟؟ ,.....شفت بقى ان حتى الصلاة اللى بنصليها دى بنتحاسب ان احنا مش بنركز فيها , مش مستشعرنها , " فويل للمصلين , الذين هم عن صلاتهم ساهون " ياااه , دول اللى بيسهوا عن الصلاة , يعنى بيقلبوها كدة , اللى هو يا عم صليت و خلاص , اصل المقصود فى الاية دى الصلاة شكلا , اللى هو بصلى و انا عمال غرقان و سارح فى الدنيا...... طب كام مرة عملنا فيها كدة ؟ .......ابتدينا نحس بقى الموقف عامل ازاى ؟ ..ربنا مدينا نعم كتيرة قوى و احنا حاجة صغيرة بتعبده , لو قعدنا نشكره طول عمرنا مش حيكفى اننا ندخل الجنة لانوا مش حيكافئ اللى ربنا اداهولك , فالمفروض بقى على الاقل نحاول نعبده حق عبادته و دى بقى بتندرج تحت اننا نكون خليفته فى الارض.... , هو من كرمه بقى انو فرض بس اركان الاسلام كأساس , فانتا حتى دى مبتعملهاش صح .......ما بالكوا بقى بتاركى الصلاة , انا مش حاقول ايه عقوبته , اللى مبيصليش يا ريت يدور فى الحاديث كدة يشوف لانها تقيلة قوى عليا انى اقولهالو بصراحة......بس عامة "بين الرجل و بين الكفر , الصلاة" S:

• حاجة تانية, عارف انك بتتحاسب على كل الوقت اللى بتضيعوا , ليه مستغلتوش فى طاعة ربنا , متقوليش انك يوم القيامة حتيجى تقول لربنا انا اتفرجت على الفيلم و قعدت على الفيس عشان ارفه عن نفسى و اعبدك بقى صح ... يا جدعان فوقوا دا الرسول (ص) اللى احنا اصلا محتاجين حسنات اكتر من ما هو محتاجها , كان ميقدرش يفوت وقت من غير ما يكون بيطيع ربنا , ما بالكوا احنا ...... , 

• حاجة برده خطيرة بجد , عارف ان انت لو بتصلى مثلا او بتتعبد او بتأمر بالمعروف , او حتى بتحفظ قران , و معندكش اخلاص بجد , يعنى بتعمل كده و من جواك بنسبة بسيطة , مبتعملش ده لربنا , دى تبقى مصيبة والله , ده يبقى كل اللى بتعملوا ملوش لزمة , يعنى لو مبتصليش غير لما حد يقولك ولا متقراش قران غير لما حد يكون معاك , فانت لو بتعملو لربنا بجد , يبقى تعملوا لوحدك !!! , يا رب بجد يرزقنا الاخلاص.....

• غير بقى طبعا كل نظرة حرام,لو عديتهم تلاقيهم كتير قوى , سيئات سيئات خاصة دلوقتى فى زمنا ده بقى حاجة عادية , حتلاقى نفسك بتتفرج على كليبات و بتشوف بقى فى كل حتة بنات و بتاع و قشطة ,.... عايز اقولك ان انت لو ده عادى بالنسبالك فدى بجد علامة مش كويسة ابدا , اصل فيه حاجة اسمها عقوبات المعاصى ,لو عمال تكمل فى معصية كدة كتير , ربنا حيبتليك بعقوبات المعاصى , منها ان انت اصلا المعصية بالنسبالك تبقى حاجة عادية وممكن كمان الموضوع يوصل لانه يبقى علنى ...
•  و عامة من خلال التجارب اللى حصلت معايا انا , او اللى حصلت مع ناس اعرفهم , فاللى عايش حياتو peace و مش شايف ان فيه مشكلة و مقضيها , دايما بيبقى تعبان نفسيا و عمره ما بيستريح , و المشكلة دى دايما بزوقه لتحت , و العكس صحيح , اللى صاين نفسه بقى من الاول , شفت ازاى عاش على طول مستريح عالاخر...

• بالنسبة بقى لكل لفظ قولته حرام , بالمناسبة الشتايم اللى بالاب و الام دى من الكبائر - "إن من أكبر الكبائر أن يلعن الرجل والديه، قيل يا رسول الله، كيف يلعن الرجل والديه؟ قال: يسب الرجل أبا الرجل فيسب أباه، ويسب أمه فيسب أمه" رواه البخاري وأحمد. , - "إن العبد ليتكلم بالكلمة من سخط الله لا يلقي لها بالا يهوى بها في جهنم" رواه البخاري. , المهم , فيه ناس ممكن تكون بتقول لفظ بذئ 100 مرة فى اليوم مثلا ... و انا قولت انهم بيقولوا اللفظ , مش انهم بيشتموا , لان فيه فرق , الناس فاكرة ان هما بيقولوا الالفاظ , مش بيشتموا بمعنى الشتيمة , لا انا اسف انت بتحور على نفسك لان فى الواقع , لما بتتنرفز بتشتم بجد , لما بس بتضايق من حد فى الشارع بتشتم بجد , فمبدأك ده غلط و خليك فاكر الحديث ده :  يقول الحبيب صلى الله عليه وسلم لمعاذ ولنا " ثكلتك أمك يا معاذ وهل يكب الناس على وجوههم أو على مناخرهم في النار إلا حصائد ألسنتهم".و على فكرة من الكبائر دى معناها بقى زى الخمر و الزنا و كده و اللى عايز يعرف اكتر ففيه لينك فى اخر النوت .....

• لما الاذان بياذن و المؤذن يقولك الله اكبر الله اكبر , و انت اصلا بتعمل الحاجة اللى فى ايدك و منفضلوا , يعنى فى الواقع بتقول ان الحاجة دى دلوقتى اهم و الصلاة بقى قشطة معايا وقت , معلش يعنى هو عشان ربنا مديك ساعتين عشان لو عندك ظروف , فانت بقى عندك ظروف على طول ولا هو يعنى الموضوع مش فى دماغك , ... خلينى اقولك حاجة برده :عَنْ ابْنِ أُمِّ مَكْتُومٍ أَنَّهُ سَأَلَ النَّبِيَّ صَلَّى اللَّهُ عَلَيْهِ وَسَلَّمَ فَقَالَ : يَا رَسُولَ اللَّهِ إِنِّي رَجُلٌ ضَرِيرُ الْبَصَرِ شَاسِعُ الدَّارِ وَلِي قَائِدٌ لَا يُلَائِمُنِي فَهَلْ لِي رُخْصَةٌ أَنْ أُصَلِّيَ فِي بَيْتِي ؟ قَالَ : ( هَلْ تَسْمَعُ النِّدَاءَ ؟ ) قَالَ : نَعَمْ ، قَالَ ( لَا أَجِدُ لَكَ رُخْصَةً ) تخيل بقى انو اعمى .... ما بالك احنا .... ,

• بالنسبة للقران برده , ينفع تبقى مسلم و الرسول بيقولك انو سبلك القران و السنة عشان متبقاش من الضالين , و انت اصلا مبتفتحش القران غير فى رمضان , و السيرة اخرك قصص ابتدائى دى ,, حقولك حاجة : كان خالد ابن الوليد اذا اخذ المصحف , بكا و قال  : شغلنا عنك الجهاد .... تخيل بقى احنا .....
• وعامة فى الموضوع ده بجد انا شايف ان هى حاجة مهمة قوى قوى اكتر من الدراسة و كدة 10000 مرة , و انت مش لازم تديها يا عم ساعة , اديها ربع ساعة قبل ما تنام , حتكسب كتييييير والله بس انت اخلص النية

 و أخيرا بقى كل الحاجات دى عبادات المفروض انها تبقى اساسية فى حياتك , دى اللى انت اصلا فاكر انك تدخل بيها الجنة و انت ضامن , لكن لأ انت عشاان توصل للدرجة اللى فيها حتكون بتعمل العبادات دى بالطريقة الصح , حتكون فهمت اصلا  ان ده اقل من انه يكون تأدية واجب ""مش بقى انك يعنى بقى معدى و ماشاء الله عليك"" , و حتعرف انك لازم برده من واجبك انك تبقى عايش خليفة ربنا فى الارض, و حتكون ابتديت تدور ازاى تعمل كدة , و متخافش ان شاء الله ربنا راسملك الطريق الصح ده , بس انت خد الخطوة !!!!!!!

"نفسى نفوق"

سبحان الله !!!! ازاى باصحى الصبح اصلى , و اغسل وشى و البس و بتاع و اروح الكلية او لو حذاكر فى البيت اين كان , ومركز قوى النهاردة عايز اذاكر ايه و عايز اكل و الحق اذاكر , او لو مش ايام الامتحانات , عندى بقى حاجة فى نشاط فى الكلية ولا عندى كورس معرفش ايه و تيجى الاجازة , ايوة بقى حشوف حدرب فين و عايز اقدم فى كذا و كذا , و عايز اسافر بقى يا جدعان اروق و بتاع !!!!!!!!!!

سبحان الله بجد ازاى انا مركز قوى كدة فى "الدنيا" رغم ان انا "عارف" ان الدنيا دى اختبار و بنحوش فيها للاخرة , و سبحان الله كمان انا بصلى 5 مرات فى اليوم , ويمكن بقرا قران و بعمل اعمال خيرية , بس برده ولا اكنى فعلا فاكر ان انا حموت قريب قوى , يعنى ربنا فرضلى 5 صلوات فى اليوم , و فرضلى صيام و زكاة و كل ده عشان معنى ان "الدنيا فانية و حوش لاخرتك" يوصلى , بس مفيش فايدة و لا اكن في حاجة , و يمكن اسمع دروس دينية و برده الاحساس نفسه مش واصلى , لان ببساطة لو الاحساس ده وصلى , مقدرش اصلا اجرؤا اعصى ربنا !!!!!!!!!!!!!!!!!

ازاى ده انا ممكن اموت فى اى لحظة , ازاى يجيلى جرأة و أعصيه , ده غيركدة ازاى ممكن اضيع ساعااااااااااااااااات فى سواء معاصى او حتى فى حاجات ولا هى معاصى ولا هى حسنات !!!! يا جدعان انا نفسى اعرف , انا ليه دايما بتصرف على انى كدة كدة داخل الجنة !!!! و انا اعرف منين , اه فى احاديث كتير تدل على ان اللى بيصلى بيدخل الجنة , بس انا اعرف منين ان صلاتى مقبولة , دا انا اصلا بصلى وبسرح و فعلا محدش يعرف ايه اللى اتقبل و ايه اللى لأ , ممكن كتير يفتكروا انهم عشان مسلمين يدخلوا الجنة , بس معلش ايه اللى عرفكوا ؟ اذا كان الصحابة اصلا كانوا دايما خايفين و يقولك انا حتى لو رجل فى الجنة و رجلى التانية برة , مضمنش انى ادخل !!! و فعلا كانوا بيتصرفوا على الاساس ده , ده هو فعلا الفرق مبينا و مبينهم ........

طب انا كل يوم ربنا بيديلى فرصة , يوم جديد استغلوا بقى , للاسف لا , اصلى ضامن فى قلبى ان فيه ايام تانية كتيير , لكن فى عقلى اه عارف ان احتمالية الموت فى اى لحظة هى 50% , سبحان الله اد ايه ربنا كريم قوى يدينى يوم و انا مستغلوش , يدينى يوم تانى و برده .....لكن كدة كدة حيجي اليوم اللى ربنا حينهيلى بيه حياتى "الدنيوية" الصغيرة قوى و اللى شبه ملهاش لازمة كوقت يعنى مقارنة بالاخرة .......

حد ابتدى يحس بالكارثة ؟ ...انا عايش كل ده و فعلا بسمى نفسى "بنى ادم مغيب" , للاسف و قال فاكر نفسى  شاب تمام بصلى و بصوم و زى الفل و بتاع , فعلا محدش يضمن اى حاجة , انا مش متخيل ابدا لو مت دلوقتى , ربنا حيسألنى كنت شايل ايه بقى لاخرتك , اقولوا ايه ! الصلاة !! طب الصلاة دى اد ايه من يومى , ساعتين , طب بركز اصلا فى الصلاة ولا حاجة بعملها و خلاص !! , اقولوا قران , طب ده اد ايه برده , فى رمضان بس ؟؟ ولا كل اسبوع مرة ولا كل يوم نص ساعة ؟ , اقولوا كنت بذاكر عشان انفع دينى ؟ , طب هل انا فعلا فى قلبى بذاكر عشان انفع دينى ولا الحقيقة جوايا انو عشان اشتغل و اتجوز , و ..... , حقولوا بنام 8 ساعات !!!!!!!!!!!!!! , 8 ساعات , يعنى انا الحقيقة قضيت تلت عمرى نايم !!!! حد متخيل , طب ازاى بقى ابقى بحوش للاخرة و انا تلت عمرى , وقتى كدة ضايع فى نوم !!!  , حقولوا بضيع 4 ساعات فى اليوم على النت , طب باعمل ايه على النت باظبط ؟؟؟

فعلا انا مش متخيل ابدا تبقى هى دى حياتى ,اللى اخرتى حتتحدد على اساسها ..................................................ا

طيب ايه بقى حل الكارثة اللى انا فيها دى ؟؟؟ , اولا من الرغى الكتير اللى فوق ده حلخص المشاكل الاساسية فى الموضوع..

أولا : انى مش حاسس ان موتى اقترب , او انى مش مركز فى اخرتى ابدا.

ثانيا:ان انا مفيش طريق واضح امشى فيه و انا مطمن انى ماشى صح , بحيث انى اموت عليه و ابقى ان شاء الله لية الثواب بالنية

ثالثا : ان وقتى الكتيير اللى ربنا مديهولى ده استغلوا كله للاخرة .

رابعا : انى عشان اقابل ربنا و انا مطمن و انى ابقى فاكر الاخرة دايما , لازم ابقى فاهم دينى صح , و امشى على نهج الرسول عليه الصلاة و السلام .

...............................................................................................................................................

أولا : تفتكروا ازاى الصحابة و الرسول عليه الصلاة و السلام كانوا دايما فاكرين الاخرة كدة ؟ , ببساطة , لانهم كانوا طول اليوم فعلا بيعبدوا ربنا , وقتهم كلوا لله , طيب انا اعمل ايه بقى عشان ابقى كدة ؟ , متهيألى انا لو ابتديت يومى بصلاة الفجر جماعة اولى فى المسجد , فده حاجة اكيد تفكرنى بالاخرة , اصل ايه اللى يخيلنى اصحى فى عز البرد و انزل وانا نفسى انام و اروح اصلى و اجى ؟ اكيد عشان غير الفرض , انا واعى انى ممكن اموت , فنفسى اموت و انا مصلى الفجر فى المسجد , بعدين طب صليت الفجر ,  اعمل ايه بقى ؟ , اظن ان اذكار الصباح و المساء من اكتر الحاجات اللى تذكر بربنا و بالاخرة , لو حد قراها حيفهم , طب ايه تانى ؟ , طب تخيل لو كل الصلوات اللى بتصليها , بتركز فى معانيها ... كفاية الفاتحة لوحدها , تفكرك بالاخرة قوى , ده لو بتركز , بس انا دايما بسرح اعمل ايه ؟ , انا رأيى ان الصلاة فى المسجد بتحل جزء كبير من المشكلة لأنك بتروح مخصوص لربنا , لبيته تصليله , تقولوا يا رب انا فاكر الاخرة , فاكر انك مراقبنى... طب و بعدين  ذاكرت و بعدين بقى ؟ , لا ثانية واحدة النقطة دى حنروحلها فى "ثانيا", طب بعد ما ظبط حوار المذاكرة بقى , او نفس الكلام لو اى كورس او  نشاط فى الكلية لازم "نية بجد , يعنى نية مظبوطة" , اعمل ايه بعد الكلام ده ؟ طبعا حيكون اليوم فى اخره , انا رأيى ان فى حاجة ممكن نعملها , مفيدة قوى تفكرنا بالاخرة قبل ما ننام , و هى ركعتين قيام و ركعة وتر , ده على الاقل يعنى , و بعديهم دعااااء بقى .....يااااااااااااه ازاى بقى فيها معنى كبير , تخيل انك مت بعد اليوم الجميل ده , اكيد قدام ربنا حتلاقى حاجة تقولها ان شاء الله "طبعا اكيد ده عمره ما حيكافئ العبادة المفروضة لله" بس ده اقل ما يمكن ........

ثانيا : اكيد محدش فينا عايش من غير هدف , فيه اللى اهدافه عبارة عن انو يشتغل فى مكان كويس و يتجوز جوازة كويسة و بس ..... و فيه بقى اللى انصح شوية منه , هدفه بقى انو يشتغل بالظبط فى شركة كذا و انو يشتغل فى موقع كذا و بعدين يكبر اكتر و اكتر , و ده جميل قوى , وفيه بقى الانصح اكتر, هدفه جنب موضوع الشغل ده بقى  و انو يكبر فيه و كدة ,  انو "يغير" , يغير فى وضع امته و بلده , نفسه يعمل كدة و حاطت لنفسه هدف فى الموضوع ده نفسه يوصلوا , طيب فى وسط كل دول , انا شايف ان احنا عشان نفكر فى احسن "حياة"اللى توصلنا لاحسن "ممات" , يبقى ببساطة , لازم نشوف احسن بنى ادم عمل كدة , و كلنا عارفين انو رسول الله صلى الله عليه و سلم , طيب الرسول كان عايش ازاى , كان عايش بهدف اساسى انو يكون خليفة ربنا فى الارض و بانه يأدى الرسالة, و بعدين بقى يفكر ازاى حيعمل كدة و على الاساس ده حدد حياته و اهدافه .
طيب احنا حاملين رسالة ؟ اه احنا اه مش علينا عبئ كبير يقارن باللى كان على رسول الله , بس علينا عبئ طبعا , احنا اسهل بكتير , كفاية قوى ان احنا ملايين المسلمين, مش زى وقت الرسول "ص" , طب من المبدأ , ده احنا لازم نحدد اهدافنا على اساس ازاى حننفع امتنا بقى فى الاخر , يعنى ازاى شغلى حينفع الدين فى الاخر و لازم ابقى جد قوى و عايش للهدف ده , طيب و نفس الكلام فى اى حاجة خيرية , لازم يبقى هدفها مش بس هدف اخلاقى , لا لازم جنبوا هدف ان العمل ده يفيد الاسلام ازاى !!! , طيب احنا دلوقتى لسة فى مرحلة اعداد , احنا فى كليات لسة , قدامنا اامذاكرة ! اه  , كلنا بقى عارفين ان ممكن وقت المذاكرة و الكلية و المحاضرات يكون فى ميزان حسانتنا , بس ازاى ؟ برده عارفين انو بالنية , بس ثوانى كدة , نية لايه بالظبط ؟ , نية لانى انفع دينى و بلدى بعلمى ده , حقولك طب ازاى ناوى بقى انك تنفع الدين و البلد بعلمك ده ؟ , حاطت لنفسك خطة محددة تنفع بيها الاسلام و البلد؟ , انا اشك , اصلى لو فعلا حاطت ده فى بالى , عمرى محنفض للمذاكرة و للكلية و المحاضرات , لانى فى الواقع حتحاسب ان انا حيفوتنى جزء من العلم اللى انا مطالب بمعرفتوا ده , و اللى حيقصر على انى افيد الدين و البلد ....و كدة اظن ان احنا علينا عبئ كبير , كدة اعتقد ان حيبقى فيه فرق كبير قوى فى حياتنا لو فكرنا بالمبدئ ده .
نفس الكلام لو انا فى نشاط معين فى الكلية اكيد ليه اهداف سامية و جميلة جدا , بس برده لازم يبقى ليه هدف بطريقة ما انو يفيد الامة و الدين فى الاخر !!! و لو غير كدة يبقى الاولى ان وقتك ده تحطوا فى حاجة تانية تفيد امتك ! ,

ثالثا بقى بالنسبة لوقتى ده ! , انا عندى يوم 24 ساعة !!! علميا احنا لو نمنا 4 او 5 ساعات فى اليوم نقدر نعيش حياة طبيعية , متقوليش لأ لأن اكيد بييجى عليك فترات مبتنمش فيها غير ساعتين أو تلاتة او يمكن تطبق .... طب لو نمت قليل , بقى معاك 19 ساعة , فيه منهم 10 ساعات بالكتير كليتك , و 3 ساعات مواصلات , يبقى فاضل 6 ساعات , لو ذاكرت منهم صافى ساعتين تلاتة , تطلع الاول , كدة بقى فاضل 3 ساعات , اللى منهم بقى نص ساعة قيام و وتر , نص ساعة تحفظ قران , نص ساعة تقرأ , و الباقى ترفه ..................طبعا انا بتكلم عن يوم معتقدش انو طبيعيى , ان واحد عنده كلية 10 ساعات و مواصلات 3 ساعات , اكيد ده مش كل يوم , عامة , كل واحد عارف وقتوا و ليه تنظيموا اللى ينفع معاه قوى , اكيد مقدرش اقولك جدولى و انت تمشى عليه , بس اللى اكيد بقى , انك مينفعش تعيش كدة و سايبها بقى ولا جدول ولا نيلة , يا عم فااااكس , لا , عايز اقولك بس لو انت اد الكلمة دى , عايز اعرفك حاجة , اقرا دى كدة :
ورد فى الاثر انه يأتي يوم القيامة لكل عبد خزائن كثيرة .. خزنة لكل ساعة من عمره تفتح امام عينيه واحده تلو الاخرى وهو ينظر ويرتقب ..
فالساعة التى اطاع الله فيها.. تكون مملوءة بالحسنات..
والساعة التى عصى الله فيها.. تكون مملوءة بالسيئات..
والساعة التى نام فيها، تكون فارغة (اذا لم ينوي لنومه نية حسنة) ... وعندها يبكي الانسان عن كل دقيقة مرت من عمره ولم ينوي فيها نية لله... خلى بالك بقى
بجد , لازم تعمل جدول لايامك دى عشان تقيم نفسك و تشوف دايما انت فين من اهدافك و من حياتك

رابعا و اخيرا : ازاى اعرف دينى صح ؟ , يا جماعة لازم لازم ندرس السيرة , و نقرا فى تفسير القران , لان ده الحاجة اللى ربنا سابهلنا عشان نعرف الطريق الصح, طب ازاى برده ؟ انا شخصبا رأيى ان فى كتب كتير قوى و دروس ممكن تنزلها على الموبايل ايا كان , سهل قوى انك تلاقيها , واللى ميعرفش يقوللى, بس صعب قوى قوى انك تنفض للموضوع , تعيش اسمك مسلم , و انت فى الواقع مش عارف غير قليل قوى عن دينك...... ,طبعا التاريخ الاسلامى بجد مهم جدااااا لان ببساطة فيه الفترات اللى الامة طلت فيها لفوق و برده اللى نزلت فيها لتحت , فده يفدنا قوى فى اننا نعلى دينا....., برده الفقه الواجب علينا , طبعا مش العلم نفسه , لكن الحاجات اللى احنا بنتعرضلها على طول و ممكن نكون بنعملها غلط , فده مهم جداا

يا رب نكون فوقنا شوية و ادركنا ان احنا فاتنا كتير و يادوب نلحق بقى نفوق